廣播達人 鄧寄塵

鄧寄塵是1950-60年代著名廣播人，在電台可以一人分飾八把聲音來演繹故事，那時他和李我、鍾偉明等，都大受聽眾歡迎。

後來鄧寄塵參與粵語片演出，少不免要唱粵曲。他和新馬是絕配，兩人更是香港楝篤笑始祖。鄧寄塵在1980年代復出拍電影，接受訪問時透露，當時他們每人都有幾組戲在身，比如在鑽石山大觀片廠拍完，就要趕去荃灣華達片場。很多時沒有劇本可跟，新馬就要臨場爆肚，鄧寄塵要執生。他們合作過多部喜劇，如《兩傻遊地獄》、《兩傻遊天堂》(1958)、《兩傻擒兇記》、《兩傻捉鬼記》(1959)。

唱片公司特別請鄧寄塵、鄭君綿把《兩傻遊地獄》、《兩傻遊天堂》等歌曲，重新灌錄。後來鄧寄塵唱片十分暢銷，特別是諧趣粵曲，名曲有他和羅麗娟《呆佬拜壽》、鄭幗寶《賣當借》、鄭碧影及鄭君綿《歡場三怪》、李慧《鄧寄塵之歌》等。

金曲重溫：《麻雀王香江自刎》  撰曲：鄧寄塵

這首諧趣粵曲，由鄧寄塵自撰自唱，表現出他多才多藝的好身手。而且將麻雀娛樂化成粵曲，論盡雀友百態，是一首罕見佳作。

(排子頭) (內場白) 殺敗了，殺敗了。(水底魚鑼邊花下句) 全憑手氣，乜野叫做高低章。枉我打到稱王，唔夠啲新仔亂搶。等如亂箭射死，我呢個麻雀大王。

(白) 呔，俺麻雀大王包勝，曾記當日，不論打大細，長途短途，我都屢戰屢勝，殺得他人，片甲不留。枕住做莊，稱王稱霸，豈不威風，誰料今日。(重一才) 遇水章，亂車大炮，不顧下家，累得我束手無策，翻本無能，綁住嚟輸，遂令我麻雀大王，威名盡喪，愧無面目，再見牌友，思想起來，真是令人氣煞唉。(暈倒介)

(大首板) 這一陣，氣煞我，場場敗將。

(開邊花下句) 我係甲級人馬，自問高章。我歷代稱王，我老豆稱為五星上將。何以連打九次，竟敗了十場。枉我著有麻雀秘術一書，早已流行市上。人人買部，個個都話我寫得週詳。點解我近來出師，好似走晒樣。場場敗北，做物打到我咁淒涼。莫非是佢進步得交關，我就不為時尚。

(中板下句) 莫非是，手氣唔好，逼我如此收場。看我作個部書，關於誅章如何，真係瞭如指掌。又關於如何叫法，我都寫得非比尋常。控制下家，威脅上家，姑何引他俾牌我上。若果是自己大牌，神經要鎮靜，唔好失常。若果上家大牌呢，又要快鬆下家，等佢雞糊快啲搶。真正是有紋有理，難怪我稱霸稱王。到今朝，點解運用無能，欠下多人街賬。估不到，今日走頭無路，嚟到大海茫茫。

(催快) 左右思量，無法想。學吓霸王，刎烏江。江水白色無波浪，似隻白板在當堂。(吊慢) 只見野草成排。

(滾花) 隱約索子在望。

(白) 唉我把你個二五八索，你個無情索子呀。我時時叫你，你就絕跡不見，反為三六九，一四七索，你就屍骸遍地，莫非是你存心與孤王作對，氣煞我呢個麻雀大王唉吔。

(二流) 成日俾人截糊，真係打到失常。若果摸隻嚟開槓，佢又實行搶槓，好似存心作對。

(滾花下句) 真係激到我嘔血身亡，耳邊廂又聽聞個啲雀友叫開檔。

(白) 不好了。

(花下句) 你話有何面目，再登大雅之堂，不若寫下遺書，投身於碧浪。

(詩白) 唉正是一代威名今朝喪，投身此地益吓啲釣魚郎。(白) 我諗住唔死都俾人激到癲夾戇。我何必唔死，(一才) 就係我呢個麻雀王呀。

(手托) 仔呀，你父已輸到光，家檔你無謂再望，你父親要自刎葬香江。(介) 仔你無謂再嚟學我戇，你千祈咪想做雀王，你務必要，負責把家當。

(哭相思) 哪呀，哪呀，唉你老豆上了麻雀當。

(滾花下句) 血書寫罷，丟係路旁。先葬部書，孤隨你往。(介) 我有符收拾，逼我自刎身亡。自問反攻無能，只有一死賴賬。

(白) 死了罷。

(四古頭煞板) 從今後，我麻雀王，各別陰陽。(雁兒落死介)