仙韻玲音 陳慧玲

陳慧玲有「新白雪仙」之稱，早期藝名是陳鳳仙，她心慕名伶白雪仙，酷愛仙腔。1960年代，她為娛樂唱片灌錄過《牡丹亭驚夢》、《三年一哭二郎橋》全劇，合唱者是鍾雲山。另外和名伶何非凡合作《雙仙拜月亭》、《血羅衫》，和名伶陳錦棠、崔妙芝的《火網梵宮十四年》，全部都是名編劇家唐滌生作品。

她處事低調，為人隨和可親，只灌錄唱片，謝絕粉墨登場。她用「陳鳳仙」名字灌唱片和幕後代唱電影插曲，女星林鳳在邵氏的粵語片，皆由慧玲姐代唱，最著名首推《榴槤飄香》主題曲。而用「陳慧玲」名字於商台主持粵曲節目，因工作關係，她和著名廣播前輩李我有師徒情誼。

陳慧玲的粵曲唱片很多，和林家聲《天姬送子》、梁天雁《釵頭鳳》、《畫中仙》，鍾雲山《追魚》等等。後來轉唱平喉，與李鳯合作《大斷橋》和《魂斷水繪園》。近年她設帳授徒，廣受學生歡迎。陳慧玲演繹仙腔有獨特韻味，我最喜愛聽她做「綠翹」，最有性格。

金曲重溫：《火網梵宮十四年》選段

原著：唐滌生        撰曲：潘一帆

演唱：陳慧玲 (飾綠翹)、陳錦棠 (飾溫璋)

綠翹：(詩白) 小樓寂寞守空幃，為求朗月照人歸。解盡痴心才十六，幾回燈下我被情迷。(四季歌) 花落花開在深閨，我今寂寞對羅幃，情焰愛火相連繫，恨怨冰冷人世少提攜。(二簧) 辜負了含蕊嬌花，辜負了蘭心質慧，(序) 我嘅年齡唔係細，(續唱) 每見鴛鴦蝴蝶，我不禁掩面把頭低。(序) 個一種心情好囈西，我心欲奪愛橫刀，又怕負人恩惠。(木魚) 閒來幾度，偷繞一隻蟠龍髻。惱煞飄零丫角，何日至有依歸。今晚果個失意人逢，花吐麗。我好應該無懼畏。(轉二簧下句) 藉此向佢投懷送抱，賣弄我一點，靈犀。呢一隻玉扣連環，可作紅娘將柬遞。(白) 我勉強啲都要做一次嘅，我地玄機姐都話過，易求無價寶，難得有情郎。今晚我既遇有情郎，咁我又何必吝嗇無價寶。而且人棄我取，就理也。如果想有聲氣嘅，就定啲啦綠翹。

溫璋：(長二簧下句) 飲泣怨聲嘶，前緣終破毀，忽狂忽笑忽哀啼，憐我劫後餘生，人隔世，鳳離鸞泊愛長違，醉後千秋成劫例，我不怨魚娘情薄，唯怨自己癖性難稽。取返隻玉扣連環，我便佯狂，避世。(推門介)

綠翹：(白) 哦，乜你返咗嚟，少爺。坐啦。

溫璋：(口古) 綠翹，你着番件衫至嚟見少爺啦，你知道你自己年紀都唔細咯，係呢，你話同我攞返你亞姐隻玉扣連環，能否歸還於此際。

綠翹：(滋油白) 你都知道我年紀唔係細嘅呢，少爺呢隻玉扣連環響呢度嚟。(口古) 勞動吓你呢隻貴手，唔該你自己嚟攞啦，你要知道呢隻玉扣連環，好辛苦至攞得返嚟。

溫璋：(白) 響邊處。

綠翹：(白) 響呢處，你攞啦。

溫璋：(滾花下句) 分明叫我解羅襦，取玉珮，真係堪憐堪笑你呢隻小山雞，你既羽未豐，翼未成，何以扮作一種淫娃色藝。(火白) 你躝開去，在我呢個傷心嘅時候，你唔應該嚟挑逗我。

綠翹：(火白) 你叫我躝開去，我偏要行埋的。(滾花下句) 你有一點無情嘅怒火，我亦有一種多情嘅妒火，我不怕你濫用神威。我若不仿蕩婦，效淫娃，唉吔我嘅痴心向你如何投遞。

溫璋：(滋油白) 綠翹，乜原來你好愛我咩。

綠翹：(白) 駛乜講。

溫璋：(口古) 第二個唔知我嘅往事，愛我都情有可原，你明知我共玄機嘅瓜葛而仲愛我，你十六年來你食邊個嘅，住邊個嘅，呢啲叫做奪愛橫刀，呢啲唔係叫做酬人恩惠。(打綠翹一巴介)

綠翹：(打回溫璋一巴介口古) 你打我，我唔會打番你，蠢才，乜嘢叫做奪愛橫刀呀，呢一種叫做報恩囉，你想吓啦，玄機姐佢嫁咗，唔能夠愛你啦，咁我代表佢嚟愛你，我代表佢嚟憐惜你。呢一種又係唔係報恩嘅所為呢。

溫璋：(長滾花下句) 小綠翹，你年尚細，知否情場多劫例，燈蛾撲火都係為情迷，若向呢朵嬌花重結蒂，負心何事不能為，我嘅歷劫情心經掩蔽，我實在無心理會，你呢隻鐵咀雞。你若不立即交番玉扣連環，恕怪我以銀刀為換禮。(喝白) 你精精地就親手遞番比我。

綠翹：(俏皮白) 我係唔比呀。(長滾花下句) 開講都話人一世，物一世，所謂轉眼曇花容易逝，殉情一死亦可慰痴迷，今夕倩女多情無懼畏，倘若狂夫不諒，我又怕乜嘢血濺春泥。易求無價寶，難得有情郎。(白) 唉吔，啋，我為你咋。(續滾花) 我又怕乜犠牲一切。(白) 少爺，你拎把刀嚟攞番隻玉扣連環，就未免小題大做啦，不如就拎把刀刺破我嘅胸膛，攞咗我個心肝仔出嚟，血淋淋，熱辣辣，你審吓佢，查吓佢，睇吓佢，度吓佢，睇吓佢係唔係真心真意愛你啦，少爺。(閉目挺胸介白) 你劏啦。

溫璋：(重一才踢帶向綠翹慢的的內心關目介白) 綠翹。

綠翹：(白) 你劏啦。

溫璋：(白) 你真係咁刁咁潑，係咪想我殺你呀。

綠翹：(白) 少爺，你要知道一個人伸得隻手出嚟，就唔係咁容易縮得番嘅。正如你遞咗把刀出嚟，斷唔會咁樣就罷手嘅。你劏啦，你殺啦。係啦，綠翹唔好命，唔死都無人恨嘅啦。

溫璋：(先鋒鈸扶攬綠翹重一才反線中板下句) 任教鐵石心，巧遇此刁情小鳳，寧不軟化如泥，陣陣女兒香，滴滴痴情淚，更使我力難自制，歷劫滄桑，情懷枯冷，誰不願再暖於羅幃。好一種小鳳嬌，適逢呢個苦渴相如，寧不被佢情焰來燒毀，在抱溫馨，已不辨人間何世，我此際神志漸昏迷。(推開綠翹滾花上句) 我若果今夜錯愛綠翹，(一才) 過去嘅品行就難擦洗。

綠翹：(口古) 少爺，原來你唔係唔愛我，不過你唔敢愛我啫，唉吔，正是世無百歲人，你又何必枉作千年計啫。

溫璋：(口古) 綠翹，一個人失意嘅時候，有邊個話唔需要人家安慰。不過以往我太對你亞姐唔住，佢嫁李公子我都唔怪佢，不過始終我都希望在佢跟前表示我改過自新，如果我今晚愛咗你。(一才悲咽) 真係三江之水都難洗我混身污泥。

綠翹：(口古) 你咪喊啦少爺，玄機姐佢今世都唔會見你嘅啦，佢已經嫁咗啦。啦，我愛你重真心過亞姐，正所謂有今生啫，唔通真係有來世咩。

溫璋：(口古) 唔好啦唔好啦，我而家都好似迷迷懵懵咁，萬不料呢隻情場老雀，比你呢隻刁情小鳳，都攪到好似如取如攜。

綠翹：(笑介滾花下句) 哥呀，你不能如斯卸責，單方面嘅事不能為。十六載如火情懷，倩那羅幃掩蔽。(與溫璋埋床介)